Beth yw Ymwybyddiaeth?
“Rho gynnig ar rhywbeth gwahanol. Mae ‘mindfulness’ yn rhoi egni yn ôl yn dy fywyd.”
“Os ydych yn gwybod ychydig neu yn gwybod dim byd am ‘ymwybyddiaeth’ mae’n werth cychwyn ar y daith o’i dysgu, a’i mwynhau. Mae’r daith yn cychwyn ag un cam. ”
Ymwybyddiaeth yw'r grefft o fod yn gwbl bresennol wrth i'n bywydau ddatgelu eu hunain o eiliad i eiliad. Gyda chwilfrydedd tawel a charedig rydym yn dysgu sut i archwilio ein profiadau, gan dalu sylw arbennig i'n meddyliau, ein teimladau a theimladau ein cyrff.
Trwy arafu i lawr a thalu sylw rydym yn dechrau sylweddoli cymaint mae'n bywydau'n cael eu gyrru gan arferion a chredoau nad ydym prin yn ymwybodol ohonynt. Mae'r gweld clir sy'n deillio o ymarfer ymwybyddiaeth yn dangos ffyrdd gwahanol o ymdeimlo â'n profiadau. Gallwn ddod o hyd i ddewisiadau newydd o sut i fod a sut i ymateb mewn unrhyw sefyllfa. Rydym yn ail-ddarganfod ein dyfeisgarwch mewnol.
Oherwydd bod ymwybyddiaeth yn ffordd naturiol o fod, gall unrhyw un yn unrhyw le ei dysgu a'i hymarfer. Mae llawer o ddiwylliannau wedi datblygu technegau o hyfforddi mewn ymwybyddiaeth, gyda'r archwilio helaethaf yn dod o'r traddodiad Bwdhaidd. Mae ein dull ni o ddysgu ymwybyddiaeth yn hollol seciwlar.
Mae'r cwrs yn cyflwyno nifer o ymarferion myfyrio sy'n archwilio'r corff a'r anadl tra'n llonydd ac wrth symud yn ysgafn. Yn ogystal mae'n cyflwyno ymarferion anffurfiol sy'n ein helpu i ddod ag ymwybyddiaeth yn rhan o'n bywydau. Er bod yr arfer yn syml a naturiol, mae'n cymryd hyfforddiant, a gall y canlyniadau drawsnewid ein bywydau.
“ Rwyf wedi mwynhau’r cwrs yn fawr iawn ac mae wedi newid fy mywyd. Yr oedd yn cyflawni’r hyn yr oeddwn wedi’i obeithio a byddaf yn ei argymell i bobl eraill sy’n chwilio am ffordd newydd o ddelio â straen ac iselder.”
Mae'r mudiad ymwybyddiaeth modern seciwlar yn prysur ymuno â'r brif ffrwd ac yn dod yn rhan o ofal iechyd, ysgolion, carchardai a gweithleoedd eraill. Mae dros 30 mlynedd o ymchwil gwyddonol yn cefnogi'r ymarfer. Mae'r astudiaethau hyn yn dangos bod ymwybyddiaeth yn gallu lleihau straen yn yr hirdymor a bod y lleihad hwn yn fanteisiol i fyw bywyd mwy bodlon. Mae'r lleihad hwn mewn straen hefyd yn effeithio'n sylweddol ar nifer o gyflyrau iechyd corfforol a meddyliol.
Gall ymarfer ymwybyddiaeth fod o fudd i broblemau iechyd corfforol neu feddyliol. Neu gallwn ei hymarfer er mwyn archwilio ein profiad a'n galluoedd yn llawnach.
“Rhoddodd ymwybyddiaeth fy mywyd yn ôl i mi. Mae’n ffrind gorau y gallaf bob amser ddibynnu arni.”
